ӘУЛИЕ ТАС

«Әулие тас» – Қора шатқалында орналасқан үлкен тас. Ол жайлы халық арасында қызық аңыз бар. Баяғыда осы жерде, өзен жағасында ауыл болыпты. Көк майсалы құнарлы мал жайылымында малдары семіріп, адамдары тыныш өмір сүріпті. Кенет үлкен жер сілкінісі болып, адамдардың үрейі ұшады. Тау жарыла құлап үлкен тау үйіндісі жолындағы мың жылдық шыршаларды қопара ауылға қарай жақындап келе жатты. Киіз үйлердің біріне қарай домалап бара жатқан тасты ештеңе тоқтата алмайтындай көрінді. Осы мезетте ол киіз үйде әйел ай-күні жетіп босанып жатады. Дүниеге жаңа келген сәбидің шыңғырған үні шатқалдың ішін жаңғыртып, бір керемет орын алды! Домалап келе жатқан таудай тас киіз үйге бірнеше сантиметр қалғанда кілт тоқтапты, содан бері бұл тасты «Әулие тас» деп атап кетіпті.

Адамдар бұл киелі тасқа келіп өздерінің тілектерін айтады. Кейбірі байлық сұраса, бірі – бақыт тілейді, тағы бірі – денсаулық сұрайды, баласыз әйелдер – бала сұрайды.